Padahal sudah baliuran buhan KPU mansosialisasikan bahwa pemilu nang wayahini ada istilah mencontreng tapi tatap ae ulun dangar urang banyak nang manyambat manyucuk atawa coblos. Khususnya urang nang sudah tuha-tuha, coblos-coblos tu pang sambatan hehehe
Ngalih pang mambuang kata nang sudah mulai jaman bahari dipakai. Barikit banar sudah di otak buhan nang tuha-tuha. Tapi biar sidin manyambat manyoblos atawa manyucuk, dalam pikiran sidin-sidin tu manyontereng jua kahandaknya. Kadanya sidin manyucuk pang. Cuma naran atau sambatannya tadih nang kada kawa maubah.
Tapi napa haja sambatannya yang penting bujur. Pemilu nang tinggal dua hari ini haja lagi mudahan aman dan lancar talaksana pas hari tanggal sembilan kena. Mamilih nang sasuai lawan hati jar urang hehehe. Tapi bujurkah mamilih sasuai kahandak hati?
Ni nang tajadi di lapangannya. Urang malahan banyak mahadang buhan caleg nang hakun mambayar suara. Jadi buhan caleg-caleg sabarataan mohon didangarakan. Lakasi buhan pian mambayar atawa mambarii buhan pemilih nang ada ni. Bagiannya hadang-hadangan ja manunggui duit. Buhannya kada tahu urusan lagi siapa-siapa kena nang tapilih duduk di kursi dewan. Ujar buhannya pandiran buhan caleg ni kada tapi kawa diingkuti jua. Nang iyanya buhan rakyat masing-masing jua ai mamparjuangakan diri saurang-saurang.
Amun sudah taduduk dikursi nang nyaman itu kada tapi taingat lagi pang lawan janji nang suah dipandirakan pas bakampanye. Ujar buhannya jangan tapi maharapakan buhan caleg. Baharap lawan usaha nang digawi masing-masing haja. Bujur haja kah yo?
Intinya kena ayu kita nang sudah bisi hak pilih kena manyontreng. Tapi jangan pina bahapal jua pang. Cari nang pina mayakinakan urangnya. Salanjutnya apa nang tajadi kena kita serahakan ja lawan nang diAtas. Habis kesah.
Tidak ada komentar:
Posting Komentar
Monggo ya dikasih komentar. Telat reply jangan marah :)