Kuncahungan

Kada tahu jua nah kata ni bahasa banjar asli atau istilah nang diulah urang ja. Nang jelas kuncahungan ni disambat gasan urang2 yang bepandiran berucau, ditambahi tatawa nang garahakan, tumbur, lawan jua nang dipandirakan ni kada jelas awal akhirnya.
Panambaian mandangar istilah kuncahungan ni pas ulun sekolah tsanawiyah bahari.
Buhan binian biasanya nang melakukan aktifitas kuncahungan ni. Mun lakian kada hehehe
Kenapa jadi buhan binian? Mun dasar bujur. Pas sekolah bahari tuh, sungsung dah rami banar buhan binian bekumpulan kuncahungan. Pandir barucau lawan tatawaan. Mun didangarakan bujur2 pandiran bagiannya tu kada tapi jelas jua. Bahanu bekesah film nang malam tadi ditonton, bahanu bekesah lakian, takananya mambahas gosip artis jua hahaha. Rami tu pang basahut-sahutan. Balum tuntung saikung bepandir, nang saikung pulang manyahut. Kesah nang sabuting balum tuntung ada pulang nang maulah kisah. Kada bahabisan tu pang.
Mun skulah masukan ampihan dulu bekesah. Tapi hadang kena mun sampai wayahnya istirahat. Basambung pulang! Bisa di warung atau bisa jua di dalam kelas ja.
Nang umpat bujur ja asa rami, tapi talinga urang nang kada umpat bapandiran alias nang mandangarakan ja asa muyak. Neto-neto haja nang dikesahkan. Tabulik-bulik =)
Tapi ulun suah jua umpatan nang kaya ini. Kesahnya pas sekolah SMA kelas 3. Pas bulan puasa, tahu kenapakah semalam tu jadi ada kebijakan pulang bahwa bulan puasa kakanakan skulah disuruh turunan 2 minggu. Harinya tu pas takana kadada guru nang mangajar, pak kosong, rupanya asa koler2 jua kalo gurunya. Mana uyuh baharaguan dirumah gasan saur mana maajar kakanakan pulang, asa uyuh ae lo. Mun kakanakan dapat pak kosong napa da lagi pada himung. Jadi, ulun wan kakawanan nang lain, ada lakian ada binian, tekumpulan dah di meja. Asalnya asing-asingnya baranaian. Lalu ae ada saikung nang mulai bakisah. Kesah nene kesah neto lalu ae manjangkit ka lain. Rami am bakesahan. Kesahnya kada mangaruan kada. Mulai bekesah makanan sampai bakesah apa gasan pambukaan kena. Kesah kesah kesah. Rami rami rami. Tatawaan. Bagayaan. Basasambatan. Bauurahan. Sampai akhirnya asing-asingnya kauyuhan. Awak asa lamah katuhukan tatawa. Ulun ja sampai bibir ni jadi asa manggatar. Akhirnya apa? Isuknya asing-asingnya am baadu-adu. Ada nang pecah. Ada taguring sampai parak magrib. Mun ulun ja gen tenggeng semalam to. Akibat napa? Akibat karamian kuncahungan.
Nah, jadi kita ni kada pa pa mun handak bararamian kayaitu. Asal baingat lawan jadi tujuan nang baik. Ni kada, kuncahungan mamandirakan urang. Ini jaka nang baik, kaburukan urang dikuya-kuya. Jadi jangan nangkaya itu kula barataan ae. Cari kegiatan tu nang bamanfaat gasan kita, bagus lagi mun gasan urang lain. Ya kalo? Akur kita hehehe ^^v