Mawarung

Siapa nang suah mawarung? Mun ulun kada lah hehe. Mawarung ni biasanya dilakoni buhan lalakian nang anum-anum. Tujuannya kada ae, daripada handak baramian banaham.
Warungnya gen jangan dikira warung nang bajual langkap saraba ada. Nang dijual tu palingan banyu gasan minuman, wadai-wadai, kacang, pokoknya makanan nang kaya itu pang.
Jadi apa nang raminya mawarung tu jadi buhan lalakian pina ketuju?
Nah, handak tahu lah pian. Ciri khas tiap warung tu ada binian bungasnya. Tukang warungnya pang. Itu pang nang maulah buhannya tu katuju.
Tahu ja kalo kakanakan wayahini, dasar katujunya marayu bibinian.
Babulik kita ka kesah mawarung. Jadi mun handak mawarung tu kada mau mun siang-siang, inya warung tu raminya pas malam. Tulakan mawarung gen kada rami mun seikung bedua ja. Standarnya baampat balima gen sadang. Sabalum tulakan, geng buhan pawarungan ni berunding dulu kira-kira warung mana nang handak ditangii. Jer seikung disini biniannya bungas, jer seikung pulang warung disana biniannya bengkeng. Jadi, harus ditantuakan dulu. Sualnya mun kena tulak sorang-sorang kada rami jadinya.
Jadi misalnya sepakat tulak kawarung nang biniannya bengkeng tulakan ae kesana beimbian. Biasanya tulakan besepeda motor ja. Jauh pang. Mun kada cukup, tunggang betiga gen digasak bagiannya ja hehehe.
Sampai disana kada pa pa ae da. Paling mamasan sprite atau coffeemix. Imbah tu paling mangaradau ae lagi lawan binian warungnya. Panderan mangabuau ja asal ada nang dipanderakan. Si tukang warung ni jua ayu tarus. Banyu surung tarus. Pelaran ujar ampun warung aku banyak bahujung hehehe.
Pender pender pender. Tahan ja buhannya sampai jam 12an mawarung. Habis ja duit empat lima puluh ribu sakali hadap.
Pian tahu lah. Di warung tu dagangannya liwar larangnya. Kopi sacangkir gen bisa diharagainya enam ribu. Bayangkan pian mun maulah dirumah. Duit saitu kawa nukar kopi lawan gula-gulanya. Ya lo? Tapi wajar ja urang warung maandak haraga saitu. Upah bapanderannya tu pang. Bilang babuihan muntung memandiri buhan geng pawarungan hahaha.
Jadi ada kawan ulun bekesah. Inya ni samalamnya datang mawarung. Pas buliknya, talalui warung nang sabutingnya. Dilihatnya pina tebungas biniannya disitu. Tapi ari sudah malam banar jadi kena ae singgah. Isuk haja jar.
Malam isuknya membuliki am. Tulaknya beduaan ja supaya inya neh nang sakira patuh badahulu lawan biniannya. Pas datang kesana, duduk ae. Dilihatnya binian nang samalam pina kadada. Nang menjaga lain pulang urangnya. Tapi daripada supan talanjur duduk dah, paksa ae mamasan banyu.
"Cil, kopi susu!" jar kawan ulun tuh pina musti ja pang.
"Kupi cu cu kah?" si acil manyahut. Pina kidas ha sidin manyahuti.
Kada lawas datang dah banyunya. Tapi hadang-hadang kadada cungul jua binian nang dimaksud. Jadi diwani-wani akan ae betakun.
"Cil, anak buah pian nang samalam mana?" jar kawan ulun betakun kesah tahu.
"Uh... Si anu kah," jar acilnya menyambat naran biniannya tuh, "Inya kada bagawi malam ni. Kauyuhan jar."
Bah am. Kadada urang nang dimaksud. Asa kada rami ae jadinya. Mamandiri acilnya kada level lalu dalam hati kawan ulun tuh. Jadi kada belawas handak bulik ae inya.
"Berapa cil?" inya betakun.
"Tujuh ribu."
HAH! Kupi nang babayanya ni tujuh ribu? Asa takajut mandangar. Mun dirumah nukar kupinya ja gen seribu dapat. Tapi dari pada supan paksa ae mambayari hahaha.
Isuk nya pas inya bekesah asing-asingnya ae mahapaki. Hapus liur tu jar bagiannya, dibunguli acil warung hehehe.
Inilah sekelumit kesah kakanakan nang mawarung. Mudahan katuju ja pian mambacanya. Ulun ni gen daripada ja jua. Daripada kadada kesah hehehe.
Kayapa? Ada nang handak umpat mawarung kah. Kena umpati buhannya. Mun ulun kada hahaha ^^v