Barucau (Batelponan)

Hanyar-hanyar ni ada kawan nang me-sms ulun
"Fik, ni aku bisi nomor menyambat naran salah satu operator selular dah. Nomorku nang hanyar. Betelponan kah kita?" Ujarnya.
Dalam hati ulun tahu ae kahandak kawan ulun ni apa. Handak membawai barucau! Haha...

Apa gerang barucau tuh?

Menurut ulun barucau tu artinya dua urang atau labih nang bapanderan sahut-manyahuti. Jadi urang lain nang mandangar tu kada jelas apa nang pelaku barucau tadi panderakan.
Tapi barucau wayahini barucau gaya masa kini. Kada musim lagi barucau nang bahadapan muha langsung tapi barucaunya lewat telpon.

Haw, kayapa tadih barucau pakai telpon? Asa kada paham aku nah!

Kaya ini nah kesahnya. Ni ada hubungannya lawan sms kawan ulun tadi. Pian tahu ja kalo. Wayahini banyak banar operator-operator selular nang manawarakan biaya betelponan nang murah. Murah nang kada murah haja, tapi murah lawan gratis-gratisnya. Jadi kada nangkaya bahari lagi nang mana biaya betelponan ni kawa disambat kada murah. Bila kada penting banar urang kada tapi hakun menelpon, me-sms haja. Ada wayahini tebalik, bila me-sms haja gawiannya dipadahakan urang kada gaul. Betelponan jar hanyar dipadahkan maumpati perkembangan jaman. Jar urang jua pang nang manyambat kaya itu. Mun gasan ulun, handak me-sms kah, betelponan kah, kada pa pa ae. Biasa ae. Hehehe...
Lawan jua wayahini (lawas pang sudah) bila betelponan kawa kada seikung urang ja, bila betelponan tu kawa pulang disambungakan ke nomor lain, jadi kawa betelponan tu urangnya langsung beberapa ikung. Conferece Call istilah jaman wayahininya. Ni salah satu layanan operator selular jua. Tapi kada kawa betelponan langsung sebanyak-banyaknya urang kada. Be lima ikung ja jar batasnya. Tapi bepandiran sekali be lima tu gen mauk kepala mandangarnya. Kada percayalah? Cubai ja =D

Jadi apa hubungannya lawan sms kawan ulun tadi? Kawan ulun tu memadahi ulun nomor inya nang ujar habarnya nomor nang inya pakai tu murah banar gasan betelponan. Bayar sedikit haja langsung tu pang dapat gratisnya. Jadi mun handak betelponan barucau pas banar tu pang. Kada kutan pulsa karing kalawasan menelpon hehe...

Jadi ulun ada suah betelponan barucau lawan kakawanan ulun. Asalnya bejanjian dulu pang bahwa malam kena betelponan baramian betiga. Pas malamnya ulun ae nang badahulu menelpon kawan ulun seikung. Hanyar nang seikung nya pulang. Betiga pang kesahnya. Sakalinya kawan nang ulun telponi ni sudah ada nang menelponi jua. Lalu ae inya sambungakan. Jadi am betelponan baampat. Sangka tadi rami ae betelponan banyak urangnya. Sakalinya camuh banar. Bingung nang mana-mana urangnya nang bepandir. Masing-masingnya ae mauk kepala mandangar. Akhirnya beimbai barataan menutup telpon. Kadi jadi barucau hahaha...

Lalu pang apa untungnya kita barucau ni? Wayahini jaman urang bahitung untung rugi. Bila gawian nang kada mambawa untung kada usah digawi =)
Nah, nang ulun dangar dari pendapat urang gawian nangkaya ini kada untungnya pang gasan kita. Dibunguli operator jarrr... Sakali dua kali panjanak bujur pang kita pina diuntungakan. Tapi itihi ja, kaasyikan barucau kada marasa lagi pulsa kita karing sahari. Sepuluh ribu jadi sekali hadap haja habis. Jadi siapa yang untung yo? =)
Lawan menurut urang jua kayaini. Kita kada dibunguli duit haja tapi kita jua jadi malupa-lupa mun sudah barucau. Cuba pian pikirakan...

Pertama, ada nang hakun barucau malam-malam sampai tengah malam (paham ja kalo maksudnya) demi maambil kesempatan menelpon gratis. Ujar urang, baik mun tengah malam dibawa bewudhu, betahajud. Pikiran kada mauk, pusang jadi hilang.
Bujur haja kah menurut pian?

Kadua, behimat-himat menelpon wan sms oleh karena jar operator murah sana gratis sini. Kada karasaan lagi pulsa habis dua tiga puluh ribu sehari kadada manyayangi. Cuba sakali pas mambuati celengan di mesjid. Seribu! Takananya duit lima ratus rupiah! Tu gen asa behayaan banar. Hahay! Duit seitu jar urang buhan gepeng gen kada manulih (uma lah, kada jua kalo lah =).
Bujur haja kah pulang?

Tasarah ja manurut pendapat pian apa. Tapi mun jar ulun, kita ni bijaksana ja. Basyukur dapat nang murah. Jadi jangan pina talalu mantangan murah. Seadanya ja. Biasa pang kaya bahari jua hehe.

Lalu pang kayapa tadih kesah sms kawan tadi?

Nah, kada jadi akhirnya barucauan. Ulun koler jua. Karena ulun begawi. Karena ulun haur. Jadi kada kawa ae =) Padahal asa handak ja pang karena lawas kada barucau hehehe. Tapi daripada mamantingakan barucau, bahujung sorang disariki urang hahaha. Baik kada usah. Baik batamuan langsung lawan urangnya, ya lo?

Siapa gerang nang me-sms tu?

Ehm, binian julak ae =D