Wayahini Dasar Jamannya Bahutang (2)

Manyambung pulang nah kesah nang samalam. Kesah sarabanya urang bahutang hehehe. Samalam pang lapah banar manulis jadi basambung kita kesahnya.

Pamulaan semalam alasannya yaitu karena urang wayahini pintar-pintar. Sudah tabaca lo kanapa ulun jadi sambat kayaitu. Jadi kita lanjut ka alasan nang kadua.
Alasan kadua menurut ulun karena urang wayahini katuju banar umpat-umpatan gaya hidup.
Seikung bisi nang kaya ini, kada mau kalah nang saikungnya. Ada pulang nang bisi nang kaya itu, rugi tu pang mun kada bisi jua. Bujur haja kah? Ni ulun ambil contoh. Kakanakan kota rami basepeda motor merek X, kada usah lawas-lawas mahadangi lihati ja dikampung, banyak jua nang bisi. Kaya apa supaya bisi, ulun wani manjamin. Takuni ha pasti kada saikung dua nang bisi tu bahutang =)

Alasan katalu atawa katiga, karna bahutang sudah jadi 'trend'
Malahan wayahini urang nang ditawari supaya bahutang. Kada ngalih lagi mun handak bahutang. Cuba pian lihati, banyak lembaga pehutangan nang cari-carian lawan urang supaya bahutang wadah inya, ya lo? Sampai-sampai ulun suah mandangar istilah, "kena kanyamanan guring mun kada bahutang". Rupanya dasar trend banar bahutang ni sudah jadi sampai ada isitilah nang kaya itu. Baik mun kada nyaman guring dibawa betahajud malam-malam. Daripada kada nyaman guring nganga-nganga kada karuan akhirnya stres hehehe.
Pina musti ja ulun mi manyuruh urang tahajud, sorang ja gen kada tagawi =P

Alasan salanjutnya apa? Nah, ulun kada tahu lagi hehe. Itu ja pang nang kawa ulun ambil kesimpulan. Adakah alasan nang lain? Silahkan pian tulis sorangan =)
Tapi hutang disini kada tamasuk hutang nangkaya buhan pengusaha gasan bisnis atawa hutang urang nang gasan biaya baubat. Ulun ni mengomentari urang nang bahutang gasan mandapat kamudahan dalam hidup hari-hari.
Tapi jangan jada ingat bahutang tu ada syaratnya jua. Apa syaratnya? Syaratnya asal kawa manahuri! Ya lo? =)
Ini ja dulu kesah ulun tentang bahutang. Bujur kadanya apa nang ulun sampaiakan bisa lain-lain menurut urang. Ulun ni hanya manyampaiakan apa nang manurut pandangan ulun.