Handak Duit Perlu nang Narannya DUIT

Kada karasaan habis pulang bulan dua, bulan februari.
Ada kamajuan jua kah?
Kada ae lah. Masih ae nangkaya bahari-bahari jua. Siang malam kadada dirumah. Baupaya mancari rezeki diri sendiri. Maklum ae nah hidup masih menyorangan hehe.
Maitihi urang nang sasar hari magin banyaman maulah sorang hiri jua nah. Asa handak jua sorang nangkaya urang-urang tu. Begawi nangkaya ini jadi duit, begawi nangkaya itu jadi duit. Nyamannya pang? Hehe.
Tapi menurut ulun. Misalnya ada urang nang menggawi sesuatu. Lalu kita lihat inya pina sukses. Dalam pikiran bisa ja kita handak menuruti. Padahal misalnya kita gawi jua nangkaya itu, balum tantu kita bisa dapat nangkaya urang dapat. Bujur kada?
Nang baiknya, bila malihat urang nang pina sukses, jangan lalu handak manuruti ja. Takuni atau lihati parhatiakan kanapa wan kayaapa jadi urang tu bisa banar mandapatakan apa nang inya handak, apa nang inya usahakan.
Jangan maniru mantah-mantah, ya kalo?

Nah, bila kita ni handak jua nangkaya urang-urang sukses tadih. Tapi ni ulun mandangar pandapat urang jua pang. Bila handak manjadiakan suatu keinginan berhasil. Dapat apa nang kita handak. Jar urang kita ni perlu DUIT.
Nyata ae, wayahini mun ada duit apa-apa ja jadi lancar!
Bujur haja mun ada nang manyambat kayaitu. Mun sudah banyak duit baapa belapah-lapah becari. Baapa bauyuh-uyuh bagawi. Tapi, nang di maksud disini lain duit nang bakabat tu pang. Tapi duit disini adalah sebuah singkatan.
D-U-I-T. Doa Usaha Ikhtiar Tawakkal. Nah, itu kesahnya hehe.

Do'a, nah ini nang paling utama. Karena doa inilah nang sabutingannya jalan gasan kita minta lawan Nang Kuasa. Kayaapa lagi kita handak maminta mun kada lawan pengatur segala sumbernya tuh.

Usaha, ini jua sama pentingnya. Biar rezeki sudah di higa telinga bila kita kada bausaha maambilnya kada mau pang kita kawa mandapatakan.

Ikhtiar, ini ada hubungannya lawan usaha. Misalnya banyak usaha nang sakiranya kawa mandapatakan apa nang kita handaki, tapi kita kada mencari jalan ka usahanya tu. Kada kawa jua kita mandapatkan. Lihati, nang ada tu urang kalo mancari gawian. Lain gawian nang mancari urang hehehe. Ada jua pang nang sebaliknya. Tapi jarang! =D

Tawakkal, bila sudah bedoa, sudah beusaha dan ikhtiar segala macam sudah jua maka ni pang lagi tahap terakhirnya. Apa nang sudah digawi kita serahkan hasilnya lawan nang Maha Pemberi. Dapat banyak kah atau dapat sadikit haja kah. Bila dapat banyak syukur alhamdulillah. Jangan kada ingat babagi lawan nang lain nang kasusahan. Bila dapat sadikit, coba pang lihati lagi D, U dan I nya. Kalo pina ada nang kada maksimal =)

Jadi apa nang ulun tulis ni kada mamadahi urang atau siapa-siapa kada. Ulun memadahi diri ulun jua ae. Mun ada isinya nang berkenan. Ayu ae pian ambili nang baiknya haja. Nang buruknya silahkan buangi. Asal jangan urang nang manulisnya ja nang dibuang hahaha.
Karena siapa yo nang kada handak nyaman (baca : sugih). Barataan ae kalo lah handak nyaman. Tapi bila DUITnya pina kada banyak kayaapa handak nyaman. Bujur haja kah?

Jadi, tadi ada kawan ulun nang manulis di tawing (dinding) Facebook ulun. Begawi apa jar supaya lakas sugih. Jawaban nang ulun bisa bari ya ini pang. DUIT. Kita kada tahu kena apa nang paling baik gasan kita. Mun kada diri masing-masing jua nang manantuakan. Ya kalo cil? Ya kalo man? Hehe.
Sebagai penutup kesah. Ulun handak mandoakan siapa ja nang mambaca tulisan ni sugih barataan. Wan ulun jua minta doa baliknya jua matan pian hehe.
Salam.