Wayahini Dasar Jamannya Bahutang (1)

Wayahini sampai dah lawan jaman dimana urang banyak dibari kamudahan. Kamudahan kayapa? Cuba pian itihi, sepeda motor wayahini bahambur. Dirumah urang asing-asingnya bisi sabuah sorang. Saapa urang rumah saitu jua urang ada bisi sepeda motor. Bayangkan pian mun lagi bahari, jangan besepeda motor, besepeda tinjak gen harat banar. Disambat urang sugih dah.
Imbah itu ada tivi. Parak sabarataan rumah dah bisi tivi. Maka ulun parhatiakan kadada lagi nang hitam putih. Bawarna barataan dah. Urang nang paling sakit gen parasa ulun ada bisi tivi. Ingatakan pian lagi bahari banar tuh. Nang bisi tipi jarang banar. Wani karumah urang bamalaman hari asal tatonton tivi. Mun ulun ja lagi halus bahari tu ingat banar, bilang parak magrib hanyar tabulik karumah karna karamian bakawanan lawan manonton tivi.
Nah, itu hanyar sepeda motor lawan tivi. Balum lagi mesin-mesin nang lain nang liwar mamudahakan urang wayihini. Mulai mesin nang ini sampai mesin nang itu. Pokoknya urang wayahini nyaman banar. Kada usah balapah-lapah begawian hari-hari dirumah. Ada ja mesin nang manggawiakan. Nang tuha jadinya kada uyuh. Nang anum apalagi. Maginnya ae kakanakan nang pina pengoler mandangani nang tuha dirumah, kehimungan inya. Picik tombol nang ini beres, ketek picikan nang itu selesai. Makanya kakanakan wayahini banyak nang bungas dan bengkeng. Kada nangkaya bahari pang muha pina kurisaan.
Kakanakan bahari gen manulungi kuitan kadada muyaknya. Ada wayahini mun muyak turunakan sepeda motor bawa belalah. Kada jaman lagi jar mun betinjak. Ni jamannya begas. Pas bajalanan bilang rajin banar bulang bulik kasana kamari. Jalannya gen tabulik-bulik. Aspal handak lingis mun dapatnya buhan kakanakan nang balaur. Bensin kada ketakaran. Apalagi bensin sudah bamurah, behimat buhannya mun handak bejalanan =D

Babulik pulang kita ke kesah jaman kamudahan.
Lalu pang urang nang banyak duit ja kah nang kawa dapat kemudahan kayaitu?
Jawabanya kada. Urang nang kada tapi panduitan gen asal bisi usaha kawa ja bisi kemudahan nangkaya urang nang lain-lain. Sepeda motor, tipi, wan apa segala macam alat kawa ja buhannya. Nangkaya apa caranya? Caranya yaitu bahutang!
Sudah kada jadi rahasia perusahaan lagi mun wayahini banyak urang bahutang. Nukar sepeda motor, alat elekronik sampai panci di dapur gen kawa dihutang.
Jangankan urang nang kada tapi panduitan, urang sugih gen banyak nang bahutang. Takuni ha pian urang nang pina bemobil-mobil tu, sing apaan ja nah kita, pasti tu barang banyak nang hutangan jua. Ya lo? Hahaha
Lalu apa alasannya jadi urang wayahini banyak wan hakun banar bahutang?
Nah, ulun kada tahu pasti alasannya. Padahal urang bahari anti banar lawan nang narannya hutang. Wani karing liur asal jangan tahutang jar hehe. Lalu ulun cubai maambil kesimpulan sorang. Jadi menurut ulun ada babarapa buting alasan.

Pertama, alasan pemulaan ni menurut ulun karna urang wayahini pintar-pintar.
Urang wayahini kada hakun lagi marasakan sakitnya hidup. Wani bahutang supaya dapat kauntungan. Haw, napa jadi bisa kayaitu?
Ni nah ulun ambil contoh, ada kuitan nang hakun bahutang sepeda motor, bahutang komputer gasan anak sidin nang kuliah. Harapan sidin supaya anak sidin tu kawa jua "bermobilisasi" mun ada kendaraan, kawa jua pintar kaya urang mun bisi komputer. Karena menurut sidin mun anaknya pintar kawa jua kena begawi nang keren hehehe. Jadi kawa jua manjaminakan hidup sidin pas tuha. Kawa tenang.
Bujur ja kah? Mun menurut ulun bujur ja pang tindakan sidin. Artinya sidin mendukung lawan anak supaya jadi pintar. Kawa ja toh pian mambedakan anak nang didukung kuitan lawan nang kada, lain kalo pintarnya =)

Kadua. Apa alasan salanjutnya menurut ulun?
Hadangi ae dulu di posting nang salanjutnya hehehe. Lapah banar dah manulis. Kada tahu pang kesahnya sepanjang ini. Tadi dalam otak ulun asa sedikit ja. Pas ditulis sakalinya panjang banar kesahnya. Jadi mun pian katuju mambaca tulisan ini, silahkan lanjutakan ka posting bagian 2 nya.