Iklan Caleg Perempuan di Radio : Bujurkah Malajari Harat Lawan Laki?

Tahu ja kalo, mun musim pemilu ni rami banar nang narannya iklan caleg wan partai. Kada di tivi, kada diradio, kada di surat kabar, barataan ada iklannya. Wan sagala daya, upaya lawan rupa bubuhan partai wan caleg mampromosikan diri. Bahaharatan tu pang. Babagai macam cara wan gaya tapi sama tuju ampahnya, duduk di bangku legislatif. Nah, dari sagala macam iklan tu ada iklan di radio nang cukup maulah parhatian ulun. Iklan caleg binian. Kanapa jadi sampai taparhatiakan? Sini nah ulun cubai bakesah.

Jadi kisahnya kaya ini. Ada sabuting iklan nang ulun dangar di radio. Isinya bakesah saurang bini nang bapadah lawan lakinya bahwa inya handak umpat jua bacari mandangani nang laki. Ujar nang laki kada usah, anak pang siapa nang maimpu. Ujar nang bini pulang manyahut, anaknya kawa ja kena diharaguakan nininya jadi nang bini kawa jua umpat bacari. Lalu si laki mangarasi pandir, binian tu di rumah haja, maasi-asi ja. Nang bini kada mau kalah, tatap haja mangarasi handak mandangani si laki bacari. Ujung kesahnya tadangar suara kaca pecah. Tapi kada jelas apa, suara si bini mahampas piring kah atawa dasar musik penggiringnya haja nang manandai kesah habis. Imbah itu hanyar suara si caleg tadangar. Ujar sidin, sudah kada jamannya lagi binian dikapinggirakan. Sudah wayahnya binian manunjukakan kakuatan gasan sama-sama mambangun. Pandir pandir pandir. Intinya si caleg tadi mambawai bubuhan binian supaya mamilih sidin di pemilu kena. Karna kesahnya sidin ini kaina kawa manjuangakan hak-hak binian.

Bapuluh-puluh kali mandangar iklan ini lawas-kalawasan jadi parhatian ulun. Ulun bapikir iklan ni pinanya salah ulah wan isi iklannya kada tepat, kada pas! Kanapa ulun jadi manyambat kaya itu, ini imbah ulun mamarhatiakan lawan manilai isi iklannya. Jadi manurut pandangan ulun nangkaya ini.
Iklan ni bakesah saputar rumah tangga urang. Asa kadada hubungannya pemilu lawan urusan rumah tangga. Ada kesah bacari ha pulang. Asa kada mungkin buhan caleg ni kaina mun sudah tapilih kawa maumapati hak-hak urang barumah tangga. Isi iklannya gin pina tasalah jua, kesah bini nang wani manjawab-jawab lawan laki. Asa kada cucuk wan pas mun dijadiakan alasan wan kada sama sakali manunjukkan saurang bini di kapinggirakan. Mana si bini ada anak nang diharagu ha pulang. Nang disuruh baimpu malah paninian. Iih mun si nini sigar, kalo pina gagaringan pang kayaapa? Mambawa awak haja gin manggatar-gatar lintuhut. Kayaapa handak maharagu pacucuan? ^^ Lawan kanapa jua jadi sampai bini handak bacari. Amun sagalanya cukup haja baapa lagi bagasak handak umpat bacari. Intinya, iklannya kada jelas. Malah manggambarakan bini nang harat lawan laki.

Ujar urang wayahini jamannya emansipasi wanita. Kadudukan binian sama lawan lakian. Tapi pada dasarnya antara lakian wan binian ni kada sabarataan kawa disamaakan. Sudah ada aturannya binian tu kayaapa, lakian kaya apa. Barataan hak ada wadahnya. Jadi mun tasalah manuntut hak bisa jadi masalah lawan si diri ampun panuntut. Misalnya lah, binian nang ditangati laki bacari kada baarti binian tu dikapinggirakan. Pasti ae ada alasannya. Manulungi laki kada baarti umpat tajun bacari. Manulungi tu bisa jua dalam hal nang lain. Nang laki bacari nang bini manyamangati. Ujar urang, mun laki uyuh ada jua bini nang maurutakan. Mun sama tapaimbai bacari. Sama uyuhnya. Lawan siapa lagi minta urutakan mun kaduanya sama-sama manggah hahaha...

Habis kata, nangkaya ini manurut ulun nangkaya itu manurut pian. Kaya ini sudut pandang ulun kaya itu pandangan pian. Masing-masing urang tu lain-lain bisi pandapat. Kada mau sabuting haja. Makanya manusia diciptakan banyak. Iya kada? =)
Ulun manulis kada bamaksud mambuncuakan atawa manyalahakan urang. Tapi bila jar pian tasalah ayu kita bujurakan. Kada rami bila ada kesah kadada bahasannya hehehe...
Salam.