Kawan Samuak Saliur

Lawas pang sudah kesahnya ni. Kesah pas ulun kada singhaja tatamu lawan kawan ulun pas sekolah di Mtsn bahari. Binian. Nang ulun tahu inya sudah kawin lawan sudah beranakan saikung. Pas tatamu asa kada mungkin gasan ulun mun kada marawa inya. Biaram ada lakinya tapi kada masalah. Maklum haja, inya tu kawan akrab ulun pas sekolah. Akrab tu pang. Sampai kami dulu manyambat, istilahnya kawa samuak saliur.

Kenapa jadi sampai baistilah kayaitu? Padahal kada gagampangan samuak saliur. Muak tu sisa atawa bakas nang dimakan. Liur tu hal nang kada baik jua. Tapi karna akrab jadi kami manyambat kaya itu. Kayapa handak kada samuak saliur mun bahari tuh minuman sabungkus ja bilang handak sabarataan umpat maisap. Asa kada pa pa ae. Wadai gin wani babagi kibit asal sabarataan marasai. Rami tu pang barakatan barataan. Sama-sama babagi, sama-sama mahormati satu lawan nang lain. Bila ada kawan nang garing, sehari ja gen kada turun sekolah langsung ja kawanan kami maelangi. Barangai asal manjingu jadi tahu habar kawan kayapa. Takananya kami bakumpulan duit saadanya gasan mambawakan kawan nang garing tadi oleh-oleh. Nang murah-murah ja, wadai karing wan susu kaleng gen cukup. Nang penting kawan nang garing tadi jadi asa himung.
Ulun ingat banar pas ulun takana garing pas sekolah. Maka wayah itu bulikan kena jam 4 kamarian. Kelas 3 pang kesahnya, jadi bulik sekolah sambung ae lagi lawan les. Jadi pas ulun garing tu kakawanan ulun liwar parhatiannya lawan ulun. Ada nang manukarakan obat, ada nang manukarakan wadai. Pokoknya kayapa caranya supaya ulun ni kada babangat garingnya. Itu pang nang maulah ulun kada suah kada ingat lawan kakawanan ulun nang bahari tuh. Karna baik maka slalu ulun mangganang.

Biar wayahini kawan ulun sudah masing-masingnya haur lawan gawian sorangan. Nang biniannya gin sudah banyak nang kawinan wan bisi anak. Tapi tatap haja bila tatamu kada suah kada ingat bataguran. Takananya bila sampat bapandiran, takesah pulang raminya jaman bahari. Kayaitu ja lagi mun handak tepandir. Asalnya tu pas lagi balum haur wan balum kawianan biasanya setahun sekali ada ja kami bajanjian batamuan dirumah kawan nang pina nyaman dicarii. Bila takumpulan rami tu pang, batakun habar masing-masing lawan babagi kesah. Tapi wayahini ngalih dah mun handak kayaitu. Bisa biniannya disariki oleh nang laki hehehe.

Lalu kayaapa kesah kawan yang tatamu tadi?
Bepandiran satumat lawan inya hanyar ulun tahu inya sakalinya jadi caleg di salah satu partai. Hoho...mun jadi caleg tu brarti jar urang wayahini gancang sponsor. Tapi kayapa jadinya kena sebagai kawan samuak saliur, ulun umpat mandoakan ja mudahan dapat nang tabaik haja barataan. Sukses barataan di jalan masing-masing.