Kesah Baelang ka Rumah Kawan Lawas

Kamarian tadi kawan ulun ada mandatangi ulun karumah. Takana angin napa kah jadi inya mambawai ulun bejalan. Bejalan ni kada biasa ha pulang. Rajin tu paling mambawai bajalan balauran, tapi ni bajalan karumah kawan lawas. Kawan ulun jaman sekolah MTs bahari. Dibawai kasana nyata ae ulun hakun. Jarang-jarang tejalan karumah kawan ulun tu, mun ulun saurang ja dua tahun ni ada dah kada badapat lawan inya.

Tulak kasana tarasa banar jauhnya. Maklum, kawan ulun ni rumahnya jauh didalam. Desa lah sudah sambatannya. Sudah jauh jalannya sakit ha pulang. Babatu-batu. Jalannya pinanya sudah diaspal tapi aspalnya kada bamutu. Pamborongnya babarang haja manggawinya kalo semalam tuh. Saurang na basapida motor gen asa tahantak-hantak. Sampai dirumah kawan ulun tadi sakalinya kadada urangnya. Ujar umanya inya bejalan tapi kada tahu ampah kamana. Jadi kawan ulun smsi ae inya. Kada lawas syukur am inya cungul. Jaka kada rugi tu pang, uyuh wan lapah manangii inya kasini :D

Tatamu kawan lawas asa rami ae. Bakisahan wan batakun habar masing-masing. Wah, tamasuk bauntung sakalinya kawan ulun ni. Jadi guru inya sudah. Adingnya gen nang dahulu ulun ingat masih baingusan wayahini sudah bagawi di parusahaan Confeed, parusahaan pakan ternak nang tamasuk ganal disini. Kesah kesah kesah, kasimpulannya ulun marasa lawas kada tatamu kawan bahari sakalinya laju banar perkembangan buhannya ni. Jadi ini jadi itu. Mentep jua toh. Kada nangkaya sorang nang tingkat perkembangannya ulun rasa liwar lambaaaat!!! Ibaratnya kawanan ulun sudah handak naik haji nang kadua kali, ulun hanyar am mandaftarakan naran hehe. Pesimis banar lah kadangarannya. Kada bulih aturannya :)

Jadi pas bakesahan tadi ada nang manurut ulun asa lucu. Jadi napa kah tadi tapandir masalah kawinan. Barataan tamasuk ulun kadada nang waninya barancana bakawinan parak-parak ni. Mamikirakan jujuran pang jar mangikih datang mana duitnya. Lalu ae ulun manunjuk sapi nang kada jauh pada rumah. Ada 8 ikung. Ujar ulun jual tuh sapi gasan jujuran. Kawan ulun sahut, mun dijual itu kadada lagi bisi investasi. Napa pulang kena usaha sampingan mun kada bisi inguan. Tapi jar kawan ulun ada pang solusi nang jitu. Sapi nang 8 ikung tu jual 6 ikung. Sisai sapi laki wan bini. Duit bajual sapi tadi bawa babini. Hanyar nang bini kena suruh maharagu sapi nang basisa dua ikung tadi, jadi hitungannya kada rugi. Tapi ujar ulun, mun kayaitu sama ae bini tadi dihitung kaya sapi. Ujar kawan ulun dasar kaya itu. Hitungan ternak kada rugi, kawa 'dipakai' ha pulang bininya. Hahaha... :D Hitungan dari pemikiran nang sangat cerdas mun kayaitu, bini dihitung sama lawan sapi :D

Kada karasaan bakesah sakalinya hari sudah kadap. Sadang ae buhan kami nang baelang handak bulikan. Kena mun ada umur wan waktu kawa pulang badapatan. Kaya itu pang kahandak. Ya kalo? Sayangnya ulun kada ingat handak mamfotoi. Padahal disana pamandangannya bagus. Suasana hutan-hutan wan kebun kelapa sawit. Pasnya bulik ari sudah kadap apa lagi nang handak difoto. Hirang banarai lagi gambarnya :)
Tapi daripada sangkal, pas bulik ulun fotoi ae suasana di jalan. Akhirnya tadapat foto nang ini. Tatamba sangkal haja pang. Foto gerbang selamat datang di kota pelaihari. Mun urang pelaihari kawa to manangguhi ni ada di daerah mana :)